iQostanai орталығында балалар жаңа оқу жылында сабақтарын жалғастыра ала ма? Ата-аналар тарапынан біздің редакцияға үйірмелер жайында сұрақтар келуде.
iQostanai орталығындағы оқу жылы аяқталуға жақын. Көптеген ата-аналар: “Балаларымыз қыркүйекте сабақтарын жалғастыра ала ма, әлде қайтадан қабылдаудан өту қажет пе?” — деген сұрақтар қояды. Сондай-ақ, оқу үдерісінің қалай ұйымдастырылатыны, топтар қалай құрылатыны, оқу бағдарламасы жыл сайын өзгеріп отыра ма және баланың бір үйірмеде қанша жыл оқи алатыны да қызықтырады.
Қостанай қаласы бойынша білім бөлімінің мәліметінше, iQostanai орталығында сабақтар 25 мамырға дейін жалғасады. Ал жаз мезгілінде орталық базасында мектеп жанындағы жазғы алаң жұмыс істейді.
– Жаңа оқу жылына келсек, мұнда бәрі нақты үйірменің бағдарламасына байланысты. Егер педагог әзірлеген оқу бағдарламасы бірнеше жылға жоспарланған болса, бала сабақтарын қайта қабылдаусыз жалғастыра алады. Тамыз–қыркүйек айларында ата-аналардың өтініштерінің негізінде балалар келесі оқу жылына көшіріледі, – деп білім бөлімі толықтырды.
Яғни, егер балаңыз үйірмеге қатысып жүрсе және бағдарлама 2–3 жылға есептелген болса, ол күзде оқуын жалғастыра алады. Ал бағдарлама бір жылға ғана арналған болса, онда қайтадан қабылдауға қатысу қажет. Тағы бір маңызды жайт — сабақтардың қалай ұйымдастырылатыны. Бір топта жасы әртүрлі 15 балаға дейін оқи алады. Бұл бірнеше баласы бар отбасылар үшін өте қолайлы әрі топтар тек жас ерекшеліктеріне ғана емес, қызығушылықтарына қарай да құрастырылады.
– Жас айырмашылығына қарамастан, iQostanai орталығындағы оқу бағдарламалары әр баланың деңгейіне сай бейімделген. Оқу мазмұны мен әдістемесі оқыту жылының ерекшеліктеріне қарай өзгеріп, біртіндеп күрделене түседі, – дейді білім бөлімі мамандары.
Бала бағдарламаға сәйкес үйірмеге бір, екі немесе үш жыл қатыса алады. Толық курсты аяқтаған соң, басқа үйірмелерге жазылып, жаңа бағыттарды игере алады. Орталықта бағдарламалау, робототехника, анимация, цифрлық дизайн секілді көптеген бағыттар ұсынылады.
Егер сізді нақты бір үйірме қызықтырса, оның оқу мерзімі мен жалғастыру мүмкіндігі туралы мәлімет алу үшін орталыққа немесе педагогтарға тікелей хабарласу ұсынылады.
Сонымен қатар, iQostanai орталығы жыл сайын балалардың қызығушылықтары мен ата-аналардың сұранысына сәйкес үйірмелер мен бағыттар тізімін жаңартып отырады. Соңғы жылдары ІТ саласына – мобильді қосымшалар жасау, киберқауіпсіздік негіздері, 3D-модельдеу сияқты бағыттарға қызығушылық күрт артты. Алдағы уақытта экодизайн, цифрлық фотоөнер және жобалық жұмысқа арналған жаңа курстар ашылады деп жоспарлануда.
Осылайша, балалар тек сүйікті сабақтарын жалғастырып қана қоймай, жаңа салаларды да зерттеп, өз көкжиегін кеңейтіп, заманауи дағдыларды меңгере алады.
Тамыз айында Damu bala платформасында әр үйірменің орналасқан жері, бағыты, жас ерекшелігіне қойылатын талаптар және бос орындар саны туралы толық ақпарат жарияланады. Сол кезде балаңызды уақытылы тіркеп үлгеру маңызды. Өйткені қызығушылық танытушылар өте көп, ал кейбір танымал бағыттарға орын санаулы ғана болады. Тіркеу жүйесі онлайн жүргізілетіндіктен, алғашқы күндері-ақ көптеген үйірмелерге орын толып қалуы мүмкін. Сондықтан ата-аналарға сайтты жиі қадағалап, қажетті құжаттарды алдын ала дайындап қою ұсынылады. Сонымен қатар, балаңыздың қызығушылығы мен қабілетіне сай үйірмені дұрыс таңдау да маңызды. Damu bala сайтында әр бағыт бойынша қысқаша сипаттама беріледі – бұл сізге бағдарлама мазмұнын түсінуге және қандай дағдылар дамытылатынын білуге көмектеседі. Егер күмәніңіз болса, орталықтың өзіне немесе үйірме жетекшісіне хабарласып, кеңес алуға болады. Кейбір орталықтар ашық есік күндерін өткізіп, ата-аналар мен балаларға үйірмемен жақынырақ танысуға мүмкіндік береді. Бұл – дұрыс таңдау жасаудың тамаша жолы.
Аяжан СЕРІК,
суретті түсірген
Лариса БОЖКО
Много сидишь в социальных сетях? Тогда читай полезные новости в группах "Наш Костанай" ВКонтакте, в Одноклассниках, Фейсбуке и Инстаграме. Сообщить нам новость можно по номеру 8-776-000-66-77