Көктем келген сайын жолдар балшық пен шалшық суға толып, көліктер тез ластанады. Әсіресе, мемлекеттік тіркеу нөмірлері қатты кірленіп, тіпті балшықтың кесірінен көрінбей қалады. Бұл – жүргізуші үшін айыппұл салынатын құқықбұзушылық.
Қостанай қаласы полиция басқармасының жергілікті полиция қызметінің аға инспекторы Әсем Ерденова көлік нөмірінің жолдағы қауіпсіздік үшін маңызды екенін атап өтті.
— Мемлекеттік нөмір – көлікті ажыратудың басты белгісі. Егер жүргізуші жол ережесін бұзса, оның нөмірін куәгерлер немесе полиция қызметкерлері жазып алуы мүмкін. Сондай-ақ, бақылау камералары арқылы да көліктің кімге тиесілі екенін анықтауға болады. Сондықтан нөмір әрдайым таза болуы керек, — дейді инспектор.
Жол қозғалысы ережелеріне сәйкес, жүргізуші сапарға шығар алдында көліктің техникалық жағдайын, соның ішінде нөмірінің тазалығын да тексеруге міндетті. Егер қар, жаңбыр, боран кезінде немесе балшық жолдарда көлік нөмірі кірлеп кетсе, оны тазалау керек.
— Егер нөмір балшықтан оқылмай қалса, бұл құқықбұзушылық болып саналады. Қазақстан Республикасының Әкімшілік құқықбұзушылық туралы кодексінің 590-бабының 1-бөлігіне сәйкес, мұндай жағдайда жүргізушіге 5 айлық есептік көрсеткіш (АЕК), яғни 19 660 теңге көлемінде айыппұл салынады, — деді Әсем Ерденова.
Ластанған нөмір – көктемде жиі кездесетін мәселе. Бірақ бұл үшін жүргізуші айыппұл төлеуі мүмкін. Сондықтан жолға шығар алдында нөмірдің таза болуын қадағалау керек. Бұл – заң талабы ғана емес, жол қауіпсіздігінің маңызды бөлігі.
Аяжан СЕРІК,
суретті түсірген Лариса БОЖКО
Много сидишь в социальных сетях? Тогда читай полезные новости в группах "Наш Костанай" ВКонтакте, в Одноклассниках, Фейсбуке и Инстаграме. Сообщить нам новость можно по номеру 8-776-000-66-77