Қостанай облысында 6 мыңнан астам бала шығармашылық және спорттық үйірмелерге тегін қатысып жүр
Бұл мүмкіндік балаларға бес жылдан бері елімізде табысты жүзеге асырылып келе жатқан «Даму бала» мемлекеттік бағдарламасы аясында беріліп отыр.
2025 жылы Қостанай облысында 30 түрлі бағыт бойынша 220 үйірме жұмыс істеп тұр. Қолөнер мен сурет салудан бастап таэквондо мен карате секілді спорттық бағыттар қамтылған. Бүгінгі таңда ең сұранысқа ие бағыт – би. 2,5 мыңнан астам бала хореографиялық үйірмелерге қатысады, бұл барлық қатысушылардың шамамен 35 пайызын құрайды.
Тамыз айында Damu bala платформасында әр үйірменің орналасқан жері, бағыты, жас ерекшелігіне қойылатын талаптар және бос орындар саны туралы толық ақпарат жарияланды. Қызығушылық танытушылар өте көп, ал кейбір танымал бағыттарға орын санаулы ғана. Тіркеу жүйесі онлайн жүргізілетіндіктен, алғашқы күндері-ақ көптеген үйірмелерге орын толып қалуда. Сондықтан ата-аналарға сайтты жиі қадағалап, қажетті құжаттарды алдын ала дайындап қою ұсынылды. Сонымен қатар, балаңыздың қызығушылығы мен қабілетіне сай үйірмені дұрыс таңдау да маңызды. Damu bala сайтында әр бағыт бойынша қысқаша сипаттама беріледі – бұл сізге бағдарлама мазмұнын түсінуге және қандай дағдылар дамытылатынын білуге көмектеседі. Егер күмәніңіз болса, орталықтың өзіне немесе үйірме жетекшісіне хабарласып, кеңес алуға болады. Кейбір орталықтар ашық есік күндерін өткізіп, ата-аналар мен балаларға үйірмемен жақынырақ танысуға мүмкіндік береді. Бұл – дұрыс таңдау жасаудың тамаша жолы.
Бағдарлама арқылы өңірдегі мектеп оқушылары өнер, музыка, спорт және хореография бағыттарында өз қабілеттерін дамытып келеді. «Даму бала» бағдарламасының тетігі өте қарапайым әрі түсінікті: ата-ана электронды түрде өтініш береді, арнайы ваучер алады, ал оқу ақысы мемлекет тарапынан төленеді. Бұл – кез келген отбасыдан шыққан балаға қосымша білім алуға тең мүмкіндік беретін жүйе.
– Би үйірмелеріне ұлттық және халық билері, эстрадалық би, бимен ансамбльде жұмыс істеу, балет, сондай-ақ балдық билер жатады. Мұғалімдер әр баланың қызығушылығына сай қызықты әрі пайдалы сабақ өткізуге тырысады. Балалар сабаққа қуана қатысады. Сұранысқа ие бағыттар қатарында бейнелеу өнері, домбыра үйрену мен вокал да бар. Түрлі бағыттардың болуы ата-аналар мен балаларға өздеріне ұнайтын саланы таңдауға мүмкіндік береді, – дейді Қостанай қаласындағы қосымша білім беру орталығының өкілі.
Жаңа оқу жылы жақындаған сайын ата-аналар балаларының бос уақытын тиімді ұйымдастыруға тырысып, үйірмелерге жазылу белсенділігі артуда. Қазірдің өзінде көптеген ата-ана онлайн жүйе арқылы өтініш беріп, бағдарламаның артықшылықтарын пайдаланып жатыр.
– Мен тегін үйірмелерді толықтай қолдаймын. Барлық ата-ананың ақылы үйірмеге апаруға мүмкіндігі бола бермейді. Ұлым төрт жасқа толғанда міндетті түрде мониторинг жасап, бізге қажет үйірмені таңдаймыз. Бұл – бала дамуына және ата-анаға көрсетілген үлкен қолдау, – дейді ата-аналардың бірі Амина.
«Даму бала» бағдарламасы тек балалардың талантын дамытуға жол ашып қоймай, ата-аналар үшін де үлкен көмек, ал білім беру мекемелері мен орталықтары үшін – қаржылық тұрақтылық кепілі.
– 2021 жылы бұл бағдарлама алғаш енгізілген кезде ең бірінші болып зардап шеккендер – балалар орталықтары болды. «Даму бала» біз үшін де, ата-аналар үшін де үлкен қолдау болды. Орталықта бала саны көбейді, жаңа бағыттар аштық, жаңа әдістер енгіздік, – дейді үйірме жетекшілерінің бірі.
2025 жылы Қостанай облысында «Даму бала» бағдарламасын жүзеге асыру үшін 1 миллиард теңгеден астам қаражат бөлінді. Ваучер алуға өтініш беру маусым айында басталған еді. Өтініштер легі өте жоғары болып, бірнеше күн ішінде барлық орын толып қалды. Үйірмелерде жұмыс істейтін мамандардың айтуынша, жылдан-жылға бағдарламаға қызығушылық артып келеді. Бұл – бағдарламаның қаншалықты өзекті әрі қажетті екенін көрсетеді.
– Балалар бос жүрмеуі керек. Үйірмеге қатысатын бала тәртіпке үйренеді, өнерге қызығады, армандай бастайды. Бұл – ел болашағына жасалған инвестиция, – дейді Қостанай қаласының тұрғыны, екі немересі бар әже.
«Даму бала» – бұл балалардың қабілетін дамытуға, ата-аналарды қолдауға бағытталған тиімді мемлекеттік жоба. Ол баланың бос уақытын пайдалы өткізуге, шығармашылық әлеуетін ашуға және жаңа ортада дамуына мүмкіндік береді. Ал баланың болашағына инвестиция жасау – елдің болашағына салынған негіз.
Аяжан СЕРІК,
сурет архивтен алынды
Много сидишь в социальных сетях? Тогда читай полезные новости в группах "Наш Костанай" ВКонтакте, в Одноклассниках, Фейсбуке и Инстаграме. Сообщить нам новость можно по номеру 8-776-000-66-77