Қостанайда өткен «Ақ жол» партиясының барлық деңгейдегі депутаттары форумы – биылғы саяси өмірдегі маңызды оқиғалардың бірі болды. Елдің түкпір-түкпірінен 168 депутат – облыстық, аудандық, қалалық және ауылдық мәслихаттардан сайланған «Ақ жол» мүшелері бас қосып, партияның ішкі үйлесімділігі мен өңірлік мәселелерді шешу жолдарын талқылады.
Форумның алғашқы күні көрнекті қазақ қайраткерлері – Міржақып Дулатов пен Ахмет Байтұрсынов ескерткіштеріне гүл шоқтарын қою рәсімінен басталды. Қатысушылар ұлттың рухани оянуына, тіл мен мәдениеттің дамуына зор үлес қосқан ұлы ағартушылардың рухына тағзым етті. Бұл символдық сәт ұрпақтар сабақтастығын және алаш идеяларына адалдықты айқындады.
Содан кейін делегаттар Ахмет Байтұрсынов атындағы Қостанай өңірлік университетіндегі ғалымның музейін аралады. Қонақтарға арналған экскурсия барысында олар ағартушы, қоғам қайраткері әрі реформатордың өмірі мен қызметімен танысты.
Экспозициядағы архивтік құжаттар мен сирек суреттер ерекше қызығушылық тудырды.
Костанай облыстық филиалы төрағасы Махаббат Жутаев форумның дәл осы өңірде өтуінің мәніне тоқталды.
– Қостанай жері – Ахмет Байтұрсынов пен Міржақып Дулатов сияқты ұлы алашордалықтардың Отаны. «Ақ жол» партиясы өзін Алаш идеяларының саяси мұрагері ретінде көреді, сондықтан форумның осында өтуі символдық маңызға ие. Біз тек ағымдағы мәселелерді талқылап қана қоймай, ата-бабаларымыз бастаған істі жалғастырып отырмыз – әділетті, демократиялық Қазақстанды қалыптастыру жолындағы мақсатымыз бір, – деді ол.
Оның айтуынша, мұндай кездесулер депутаттарға тәжірибе алмасуға, заңнамалық бастамаларды талқылауға және өңірлік мәселелерді шешудің ортақ тәсілдерін қалыптастыруға мүмкіндік береді.
Форум барысында партия қызметінің негізгі бағыттары қаралып, депутаттық корпустың жұмысы қорытындыланды. Сондай-ақ қатысушылар еліміздің даму басымдықтары бойынша бірқатар ұсыныстар енгізіп, қорытынды резолюция қабылдады. Депутаттар фракциялардың жұмысына есеп беріп, партияның күн тәртібіндегі басты бағыттарды талқылады. Атап айтқанда, жаңа салық кодексі мен шағын-орта бизнеске тәуелді арнайы салық режимін қолдану мәселелері ерекше назарда болды. Мәслихаттардан сайланған депутаттар, көбінесе кәсіпкерлерден құралған, парламент фракциясының позициясын қолдап, бірнеше даулы нормаларды қайта қарауды ұсынды. Олар салық кодексіне енгізілген 795 кәсіп түрінің тізімін қысқарту арқылы бастапқыда белгіленген 44 түрге қайтару жөніндегі шешімді «үлкен жеңіс» деп бағалады.
Форумның бір өзекті талқылауы – парламент құрылымын реформалау мәселесі, бір палаталы парламентке көшу идеясымен қатар, жергілікті мәслихаттарда мажоритарлық элементті сақтап қалу мүмкіндігі ұсынып талқыланды. Бұл – партия үшін жаңа институционалдық бағдар іздеу жолындағы маңызды қадам. Сондай-ақ «Ақ жол» Қазақстан демпартиясы жастар, әйелдер, мүмкіндігі шектеулі азаматтар мен әртүрлі этникалық қауымдастықтардың партия құрылымдарына белсенді қатысуын арттыруға күш салу керектігін атап өтті.
Практикалық бағыт та назардан тыс қалмады. Қостанай филиалы кәсіпкерлер мен депутаттардың бірге жұмыс жасауын қамтамасыз ету үшін бірнеше өнеркәсіп орындарына – «Allur», «Агромашхолдинг», «KamLit» зауыттарына және жақында іске қосылған KIA автомобиль зауытына экскурсия ұйымдастырды. Сол жерде өңірлік компанияларға автомобиль және техника бөлшектерін өндіру мүмкіндіктері таныстырылды. Бұл іс-шара – партияның өңірлік экономиканы қолдауға деген ниетінің айқын көрінісі.
– Біз бұл жерде тек міндеттерді талқылау үшін ғана жиналған жоқпыз. Біз ата-бабаларымыз бастаған істі жалғастырып, Қазақстанның демократиялық жолын нығайту, қуатты азаматтық қоғамды дамыту және халықтың дауысы естіліп, нақты нәтиже беруін қамтамасыз ету біздің басты мақсатымыз. Форумның негізгі тақырыптары – түрлі деңгейдегі депутаттардың тәжірибе алмасуы, өңірлердегі әлеуметтік-экономикалық мәселелерді талқылау және билік органдары мен халық арасындағы өзара байланысты күшейту. Себебі дәл осы бағыттар бойынша атқарылған жұмыс біздің сайлаушылар сұранысына қаншалықты тиімді жауап бере алатынымызды айқындайды, – дейді партия төрағасы Азат Перуашев.
Форум соңында партия жоғары мемлекеттік және партиялық наградаларды табыстады. Президенттің жарлығымен «Құрмет» ордені мен «Ерен еңбегі үшін» медальдары партияның бірқатар мүшелеріне берілді. Сонымен қатар белсенді филиалдарды марапаттады. Бірінші орын Қызылорда облысы, екінші орын Қостанай және үшінші орын Түркістан облысына табысталды.
Әр делегаттың пікірінше, мұндай форумдар депутаттардың бір-бірімен тәжірибе алмасуына, жергілікті үкімет пен бизнес арасында құралған көпірді күшейтуге септігін тигізеді.
Сонымен қатар форум аясында шағын және орта бизнес өкілдері де өз пікірлерін білдіріп, алғыстарын айтты. Кәсіпкерлердің айтуынша, мұндай кездесулер өзекті мәселелерді талқылауға, ұсыныстарды тікелей депутаттарға жеткізуге мүмкіндік береді.
– «Ақ жол» партиясы әрдайым кәсіпкерлердің мүддесін қорғайды. Бүгін осындай ашық диалог алаңы ұйымдастырылғанына ризамыз. Бұл бізге бизнестегі түйткілдерді ашық айтуға және шешу жолдарын бірге іздеуге мүмкіндік береді, – деді костанайлық кәсіпкер.
Форум қатысушылары бизнес қауымдастығымен ынтымақтастықты одан әрі нығайту қажеттігін атап өтті. Партия өкілдері кәсіпкерлердің ұсыныстарын тыңдап, олардың тәжірибесін заңнамалық деңгейде ескеруге дайын екендерін жеткізді. Қостанайдағы «Ақ жол» форумы – символикалық рух пен прагматикалық іс-қимылды ұштастырған оқиға, ескерткішке гүл қоюдан бастап, салық режимдерін талқылауға және зауыттарға экскурсияға дейінгі аралықта партия нақты міндеттерді алға тартты. Бұл өңір үшін, әсіресе шағын және орта бизнеске қатысты бастамалар тұрғысынан, маңызды мүмкіндік – жергілікті әлеует пен талапты ұлттық деңгейге шығаруы мүмкін. Оның үстіне, партияның өңірлік белсенділігін күшейту мен қоғаммен тығыз байланыс құру амбициялары осы форумда нақты көрініс тапты.
Аяжан СЕРІК,
суретті түсірген
Лариса БОЖКО
Много сидишь в социальных сетях? Тогда читай полезные новости в группах "Наш Костанай" ВКонтакте, в Одноклассниках, Фейсбуке и Инстаграме. Сообщить нам новость можно по номеру 8-776-000-66-77