2025 жылдың 1 қаңтарынан бастап мемлекет қолдауымен тегін берілетін дәрі-дәрмектер тізімінде бірқатар өзгерістер орын алды
Бұл өзгерістер халық арасында алаңдаушылық туғызып, әлеуметтік желілер мен қоғамдық талқылаулардың негізгі тақырыбына айналды.
Жаңа ережелерге сәйкес, Фуросемид, Ивабрадин, Софосбувир сынды препараттар, сондай-ақ, ингаляцияға арналған Олодатерол және Тиотропия бромид ерітінділері, капсуладағы Прегабалин секілді тағы он шақты дәрі енді тегін берілмейді.
Денсаулық сақтау саласының өкілдері бұл өзгерістерді бюджеттік қаражатты тиімді пайдаланумен және дәрі-дәрмектерді сатып алуды оңтайландырумен байланыстырады. Атап айтқанда, облыстық басқарма өкілі Гүлнар Оспанова:
– Тегін дәрі-дәрмек тізімінен алынған препараттардың көбінің баламалары бар. Бұл өзгерістер науқастарға кері әсер етпейді, себебі бұл дәрілердің жиі қолданылмайтыны анықталды, – деді.
Алайда, мұндай мәлімдемелерге қарамастан, көптеген пациенттер бұл жаңалықты алаңдаушылықпен қабылдады. Созылмалы аурулармен тіркеуде тұрған науқастар тегін дәрі-дәрмектердің қолжетімсіз болуынан зардап шегуі мүмкін деп қауіптенеді. Дәрі-дәрмектердің қолжетімділігі денсаулық сақтау жүйесінің басты мәселелерінің бірі болғандықтан, бұл тақырып халық арасында өзекті болып қала береді.
Сонымен қатар, өзгерістер аясында қант диабетін емдеуге арналған дәрі-дәрмектердің жаңартылған тізімі енгізілді. Бұл тізім пациенттердің қажеттіліктеріне және мамандардың ұсыныстарына сай әзірленген. Бұл қадам денсаулық сақтау жүйесінің ресурстарын науқастардың ең қажетті дәрі-дәрмектеріне бағыттауға мүмкіндік береді.
Мамандардың пікірінше, бұл өзгерістер денсаулық сақтау жүйесінің басымдықтарын нақтылап, тиімділікті арттырады. Тегін дәрі-дәрмектердің жаңартылған тізімі бюджет қаражатын мақсатты түрде жұмсауға және басым ауруларды емдеуге арналған дәрілердің қолжетімділігін арттыруға бағытталған.
Пациенттерге дәрігерлерімен кеңесіп, қажетті баламаларды алдын ала анықтауға кеңес беріледі. Қосымша ақпаратты өңірлік денсаулық сақтау басқармаларынан немесе емханалардан алуға болады.
Бұл өзгерістер денсаулық сақтау жүйесін заман талабына сай бейімдеу және қолжетімділікті жақсарту мақсатында жасалуда. Алайда, олардың халықтың денсаулығына әсері алдағы уақытта айқын болады.
Тегін дәрі-дәрмек алу үшін науқас алдымен өз учаскелік дәрігеріне жүгінуі керек. Дәрігер медициналық көрсетілімдер болған жағдайда қажетті рецепт жазып береді. Рецептпен бірге жеке куәлікті алып, емхананың дәріханасына бару қажет.
-Медициналық көмектің сапасын арттыру және дәрі-дәрмектерді уақтылы жеткізу мақсатында мемлекет осы жүйені тұрақты түрде жетілдіріп отырады, – дейді маман.
Еске салайық, жедел медициналық көмек көрсету кезінде, сондай-ақ тәулік бойы немесе күндізгі стационарда емделу барысында дәрі-дәрмектер ауруларды диагностикалау және емдеу клиникалық хаттамаларына сәйкес тегін беріледі.
Сонымен қатар, тегін дәрі-дәрмектерді алу құқығы әлеуметтік маңызды және созылмалы аурулары бар науқастарға да беріледі. Мұндай дәрілердің тізімі Денсаулық сақтау министрлігі бекіткен тәртіп бойынша қалыптастырылады. Пациенттер өздерінің дәрі-дәрмектік қамтамасыз ету мәртебесін анықтау үшін «Дәрі-дәрмекпен қамтамасыз ету» порталы арқылы немесе емхана әкімшілігіне жүгіну арқылы тексере алады.
Аяжан СЕРІК,
суретті түсірген
Лариса БОЖКО
Много сидишь в социальных сетях? Тогда читай полезные новости в группах "Наш Костанай" ВКонтакте, в Одноклассниках, Фейсбуке и Инстаграме. Сообщить нам новость можно по номеру 8-776-000-66-77