Костанайда академик Зұлхарнай Алдамжар атындағы Костанай әлеуметтік-техникалық университетінің мерейтойына арналған «Алдамжаров оқулары – 2024» халықаралық ғылыми-тәжірибелік конференциясы өтті. Іс-шара университеттің негізін қалаушы академиктің туған күніне орай ұйымдастырылды. Зұлхарнай Алдамжар ғылым мен білімнің дамуына елеулі үлес қосқан тұлға ретінде есте қалады.
Конференцияның басты тақырыбы – Қазақстанда атом энергетикасы мен өнеркәсіп саласын дамытудағы ғылыми-технологиялық басымдықтар. Кездесудің мақсаты – инженерлік-техникалық білімді ғылым мен өндіріспен интеграциялау мәселелерін талқылау және елдің өнеркәсіптік кешенін дамыту бойынша шешімдер іздеу.
Іс-шараның ашылуында университет ректоры Руслан Абдуллин жиналған қауымға алғыс білдіріп, конференцияның маңыздылығын атап өтті:
– Бүгінгі конференция – тек біздің университетіміз үшін емес, жалпы еліміздің ғылыми және өндірістік даму жолында маңызды оқиға. Бұл – идеялар мен тәжірибелер алмасатын алаң. Баршаңызға осы шараға атсалысқандарыңыз үшін шын жүректен алғысымды білдіремін, – деді ректор.
Сонымен қатар, жиын барысында университет президенті Бибігүл Алдамжароваға білім саласына қосқан үлесі үшін «Ахмет Байтұрсынұлы» төсбелгісі табысталды. Бұл жоғары марапат университеттің білім беру саласындағы ерекше жетістіктерін мойындаудың белгісі болды.
Ректор Руслан Абдуллин сондай-ақ университеттің өміріне елеулі үлес қосқан жандарды марапаттап, олардың еңбегіне алғысын білдірді. Мұндай марапаттау рәсімдері білім ордасының дамуына атсалысқан қызметкерлер мен серіктестердің еңбегін бағалаудың маңызды бөлігіне айналды.
Әр жылы Зұлхарнай Алдамжардың туған күнінде университет оның есімімен байланысты түрлі іс-шаралар өткізеді. Бұл конференциялар, дөңгелек үстелдер мен кездесулер академиктің идеялары мен еңбектерінің қазіргі Қазақстан үшін маңыздылығын айқындайды.
Академик негізін қалаған университет өз жұмысын бастаған жылдан бері мыңдаған білікті мамандарды даярлап шығарды. Бүгінде оқу орны заманауи тәсілдерді өндірістік тәжірибемен ұштастыра отырып, білім беру бағдарламаларын ұсынады.
«Алдамжаров оқулары – 2024» конференциясы университеттің негізін қалаушының дәстүрін жалғастыра отырып, елдің экономикасы мен өнеркәсібін дамытуға үлес қосатын мамандарды даярлау орталығы ретіндегі маңызын тағы бір рет көрсетті.
Аяжан СЕРІК,
суреттерді университет ұсынды
Много сидишь в социальных сетях? Тогда читай полезные новости в группах "Наш Костанай" ВКонтакте, в Одноклассниках, Фейсбуке и Инстаграме. Сообщить нам новость можно по номеру 8-776-000-66-77