Берекесі мен бірлігі жарасқан Смамбаевтар әулеті

Қостанай қаласында дәстүрлі «Мерейлі отбасы» байқауының қалалық кезеңі өтуде. Бұл байқау отбасы құндылықтарын дәріптеп, көпшілікке үлгілі жанұяларды таныстыруды мақсат етеді. Биыл қатысып отырған отбасылардың ішінде өзара сыйластықты ту еткен, татулықтың үлгісі саналатын Смамбаевтар әулеті де бар.

Отағасы Сұлтан Балтаұлы Смамбаев – Қостанайдағы Жеке өртке қарсы қызметінің басшысы. Ол 1969 жылы 22 ақпанда дүниеге келген. Боровской ауданындағы Барьки ауылында мектепті бітірген соң, 1987 жылы әскерге шақырылып, Псков қаласында әскери борышын өтейді. 1989 жылы Қостанайға оралып, содан бері осы қалада еңбек етіп келеді. Бүгінде теміржол саласында қызмет етеді.

Өмірлік жары Ляззат Оралбайқызымен, әскери борышын бірге өтеген досы арқылы танысқан. Ляззат ханым да теміржол саласында жұмыс істейді, «Транстелеком» компаниясында телеграфист болып қызмет атқарады. Жас жұбайлар 1990 жылы шаңырақ көтеріп, бүгінде үлгілі отбасының негізін қалады.

— Отбасы – бұл үлкен жауапкершілік. Екі адам бір-бірін қолдап, бірге өсіп-өркендеуі керек. Біздің басты қағидамыз – өзара сенім мен құрмет. Егер отбасы мүшелері бірін-бірі түсініп, қолдаса, қандай қиындық болмасын еңсеруге болады, – дейді Сұлтан Балтаұлы.
Смамбаевтар жанұясында төрт бала өсіп, әрқайсысы өз жолын тапты. Әке-шешесі балаларын өз бетінше таңдау жасауға, өз армандарына жетуге тәрбиеледі.

Руслан – Қостанай қалалық онкологиялық көпсалалы ауруханасында хирург-онколог болып жұмыс істейді. Дана – Астанада «Самұрық-Қазына Констракшн» компаниясында жоба мониторингі және жобалау бөлімінің жетекші маманы. Жүсіп Алматыдағы Қазақстан-Британ техникалық университетінің үшінші курс студенті. Бейбарыс Сұлтанұлы Қостанайдағы Назарбаев Зияткерлік мектебінің 7-сынып оқушысы.

— Балаларымның мамандығын өздері таңдағанын қаладым. Әрине, олардың менің жолымды жалғастырғанын қалар едім, бірақ олар өз жүрек қалауымен таңдаған жолды дұрыс деп санаймын. Біз әрдайым олардың шешімдерін қолдап отырдық. Бүгінде олар өз салаларында табысты еңбек етіп, дұрыс бағытта келе жатыр деп сенемін, – дейді отағасы.

Смамбаевтар отбасында көптеген дәстүрлер сақталған. Олардың бірі – барлық отбасы мүшелерімен мейрамдар сайын жиналып тұру.

Сонымен қатар, отбасы шахмат турнирін өткізуді дәстүрге айналдырған. Жеңілген адам жеңімпаздың тілегін орындауға міндетті. Бұдан бөлек, әкелері балаларымен бірге балық аулауға, моншаға баруға және қыста суық суға шомылуға үйреткен.

Сұлтан Балтаұлы 35 жылдан бері жары Ляззат ханыммен тату-тәтті ғұмыр кешіп келеді. Бүгінде көптеген жастардың отбасын сақтап қала алмайтынына алаңдайтынын айтады.

— Біздің буын үшін отбасы – қасиетті ұғым. Қазір жастар тез үйленіп, тез ажырасып жатады. Оның басты себебі – бір-біріне жол бермеу, түсініспеушілік, сенімнің жетіспеуі. Егер жұбайлар бірін-бірі құрметтеп, қиындықты бірге еңсерсе, отбасы берік болады, – дейді ол.

Ол жас отбасыларға сабырлы, төзімді болуға және қиындықтарды бірге жеңуге кеңес береді.

— Үйлену – оңай, бірақ отбасы болу – үлкен жауапкершілік. Жас жұбайлар махаббатты сақтап, өзара сенім артса, бақытты ғұмыр кешеді, – деп ой қосты.

Бұл әулет үшін басты қағидалар – махаббат, сыйластық, сенім. Балаларының дұрыс жол таңдағанына сенімді ата-ана бүгінде немерелерінің де тәрбиесіне ерекше көңіл бөліп отыр.

— Біздің міндетіміз – тек ата-ана болу емес, балаларымызға дұрыс жол көрсетіп, оларға сенім арту. Егер балаңызға сенсеңіз, ол да өз күшіне сеніп, өмірде өз орнын табады, – дейді Сұлтан Балтаұлы.

Осындай үлгілі отбасылар қоғам үшін маңызды. Олар тек өз балаларына ғана емес, айналасына да өнеге көрсетіп келеді. Смамбаевтар әулеті «Мерейлі отбасы» байқауында жеңіске жетіп қана қоймай, өз өмірлік ұстанымдары арқылы көпшілікке үлгі болатыны сөзсіз.

Байқау «Қостанай қаласы әкімдігінің ішкі саясат бөлімі» ММ тапсырысы бойынша «Жастар ортасында қазақстандық отбасының оң имиджін насихаттау» мемлекеттік әлеуметтік жобасы аясында өтуде, «Жаңашыр бол» ҚҚ іске асыруда.

Аяжан СЕРІК,
суретті ұсынған кейіпкер