Қостанайда жыл сайын өтетін «Мерейлі отбасы» байқауы басталды.
Бұл байқау отбасылық дәстүрлерді сақтап, ұрпақ сабақтастығын жалғастырып келе жатқан үлгілі отбасыларды біріктіреді. Биылғы қатысушылардың бірі – Байдукеновтар отбасы. Олардың тарихы – тек мықты отбасының ғана емес, сонымен қатар өз кәсібіне адал қызмет етіп жүрген еңбекқор мамандар әулетінің тарихы.
«Қостанай-Су» кәсіпорнындағы еңбек жолы Байдукеновтар отбасының бірнеше ұрпағы үшін жұмыс орнына айналды. Үш ағайынды осы салада қызмет етіп, олардың жалпы еңбек өтілі 50 жылдан асады. Олардың бірі – Берік Байдукенов.
—Мен Ұзынкөл ауданы, Отынағаш ауылында дүниеге келдім. Отбасымызда он бала болдық, қарапайым отбасында өстік. Сондықтан мектеп бітірген соң көп таңдау болмады: не фермада мал бағу, не механизатор болу, – дейді Берік Байдукенов.
Отбасының отағасы механизатор мамандығын таңдады. Ұзынкөлдегі СПТУ-ді бітіріп, туған ауылына оралып, механизатор, жөндеуші, бригадир болып жұмыс істеді. Ал 2002 жылы үлкен ағасының кеңесімен Қостанайға көшіп, «Қостанай-Су» кәсіпорнына жұмысқа орналасты. Міне, әлі күнге дейін осы жерде жұмыс істеп келеді.
Биыл Байдукеновтар отбасы шаңырақ көтергеніне 26 жыл толуын атап өтуде. Берік пен Ақбота екі бала тәрбиелеп отыр, олар да өз жолын тауып, жетістікке жетуге ұмтылуда.
Ұлдары – Ильсуров Алиби. Ол №5 мектепте кадет сыныбында оқыған, кейін Автожол колледжіне түсіп, геодезист мамандығын меңгерді. Колледжді тәмамдаған соң, білімін жетілдіру үшін Челябі мемлекеттік университетіне оқуға түсіп, экономика мамандығын игеруде. Қазіргі таңда «Қостанай-Су» кәсіпорнында өндірістік-техникалық бөлімнің инженері болып жұмыс істейді. Қыздары – Ильсурова Айша. Ол да кадет сыныбында оқыды, бірақ №28 мектепте. 2024 жылы 11-сыныпты аяқтап, Қостанай өңірлік университетіне оқуға түсті. Бүгінде ол ағылшын тілі пәнінің мұғалімі мамандығын меңгеріп жатыр. Ақбота Токмурзиновна Қостанай облыстық Полиция департаментінде бас маман болып қызмет атқарады. Жұмысбастылықтарына қарамастан, Байдукеновтар отбасы әрдайым бірге уақыт өткізуге тырысады.
—Біз демалыс күндерін және кештерді бірге өткізуге тырысамыз, – дейді Ақбота. – Көбінесе табиғатқа шығып, саяхаттағанды ұнатамыз. Отбасымызбен Қырғызстандағы Ыстықкөлге, Алматыға барып қайттық.
26 жыл отасқан ерлі-зайыптылар жастарға үлгі боларлық кеңестер бере алады.
— Ең бастысы – өзара сыйластық, қамқорлық, бір-біріңді тыңдай білу, түсіністік пен қолдау көрсету, — дейді Ақбота. — Қазіргі жастар барлығы дайын болған соң ғана үйленіп, соны бағаламай жатады.
Ақботаның айтуынша, мықты отбасы құру үшін төзімділік пен түсіністік қажет. Кез келген жағдайда ортақ шешім қабылдап, қиындықтарды бірге еңсеру өте маңызды.
— Біз үйленген кезде барлығын бірге бастадық. Өз еңбегімізбен сатып алған әрбір қасық біз үшін қымбат. Біз өз еңбегімізді де, өзгенің еңбегін де құрметтейміз, – дейді ол.
Сонымен қатар, Байдукеновтар отбасында ашықтық пен сенім маңызды рөл атқарады.
— Бізде бір-бірімізден жасырын сыр жоқ, – дейді Ақбота. – Қандай шешім қабылдасақ та, әрдайым ақылдасып, келісіп әрекет етеміз.
Байдукеновтар ерекше отбасылық дәстүрлері болмаса да, олар үшін үлкендерді құрметтеу, қонақжайлылық және отбасы мүшелерінің пікірін тыңдай білу – басты құндылықтар болып саналады.
— Біздің үйімізде сыйластық, сенім мен түсіністік басты орында. Осындай құндылықтар отбасы беріктігін сақтап, балаларымызға дұрыс тәрбие беруге көмектеседі, – деп бөлісті Ақбота Байдукенова.
Бұл отбасының өмірлік ұстанымы – махаббат, адал еңбек пен дәстүрді сақтау арқылы берік отбасы құру.
Байқау «Қостанай қаласы әкімдігінің ішкі саясат бөлімі» ММ тапсырысы бойынша «Жастар ортасында қазақстандық отбасының оң имиджін насихаттау» мемлекеттік әлеуметтік жобасы аясында өтуде, «Жаңашыр бол» ҚҚ іске асыруда.
Аяжан СЕРІК,
суретті ұсынған отбасы
Много сидишь в социальных сетях? Тогда читай полезные новости в группах "Наш Костанай" ВКонтакте, в Одноклассниках, Фейсбуке и Инстаграме. Сообщить нам новость можно по номеру 8-776-000-66-77