«Теңіз жағалай жүгірген тарғыл төбет» спектаклінің алдын ала көрсетілімі өтті

Шыңғыс Айтматовтың «Теңіз жағалай жүгірген тарғыл төбет» шығармасының желісімен сахналанған спектакльдің алдын ала көрсетілімі журналистер мен блогерлердің назарына ұсынылды

Бұл қойылым көрерменді терең ойға жетелейтін, ұлттық мәдениеттің, дәстүр мен рухани мұраның маңыздылығын дәріптейтін туынды ретінде ерекше әсер қалдырды.

Спектакльдің басты кейіпкері – Кириск есімді бала. Ол үлкендерден өз ұрпағының тарихы мен даналығын қабылдайды, бірақ оның жолында ауыр сынақтар кездеседі. Нағыз ер жігіт болу үшін тек күш пен батылдық қана емес, рухани беріктік те қажет. Бұл қойылым адамның өмірлік таңдаулары мен күрес жолдарын айшықтай отырып, көрерменге терең философиялық сұрақтартарға жауап іздеуге негіз болады.

– Бұл спектакль көрерменнің жан дүниесін қозғайтын шынайы өнер туындысы. Кириск пен оның тағдыры арқылы біз өмірдің қатал заңдылықтарын еске алдық. Оған қоса жарық және арнайы эффектердің арқасында көрермен одан сайын қойылымды өзі арқылы сезіне білді, – дейді қаламыздың блогері Анна Парсанова.

Қойылым режиссерінің айтуынша, бұл спектакль тек Айтматовтың шығармасының желісі ғана емес, автордың балалық шағындағы естеліктерімен де тығыз байланысты. Сондықтан да қойылым ерекше шынайылығымен әрі терең мазмұнымен ерекшеленеді.

Алдын ала көрсетілімге қатысқан журналистер мен блогерлер қойылымның ерекше әсер қалдырғанын атап өтті.

– Айтматов шығармалары қашанда терең ойға жетелейді. Бұл спектакль де сондай – көзге жас үйірерлік, жүрекке жетерлік қойылым. Декорациясы, актерлік шеберлік – барлығы жоғары деңгейде, – деп бөлісті көрермендердің бірі.

Спектакльдің ресми премьерасы бүгін және 21-22 ақпан күндері өтеді. Қазақ әдебиетінің жауһары саналатын туындыны театр сахнасында көру – әрбір мәдениет жанашыры үшін ерекше мүмкіндік. Көрермендерді ұлттық мұра мен терең философиялық ойларға жетелейтін қойылымды тамашалауға шақырамыз.

Аяжан СЕРІК,
суретті түсірген автор