Стамбұл қаласында дүние жүзінің түкпір-түкпірінен әйелдер көшбасшылары, кәсіпкерлер, бизнес өкілдері мен мемлекеттік қайраткерлердің басын қосатын ең ірі халықаралық форумдардың бірі – Global Summit of Women 2026 аяқталды
Биыл саммитке Қазақстан атынан 43 қатысушыдан құралған делегация және құрамында Қостанай облысының өкілдері де қатысты.
Биыл Қостанай облысынан Әйелдердің жаһандық саммитіне төрт қатысушы қатысты. Облысымыздан делегация құрамына Қазақстан Іскер әйелдер қауымдастығының үш өкілі және Әйелдер күштері альянсының бір өкілі енді: Светлана Михайленко, Гүлвира Құдайқұлова, Лисаков қаласынан Елена Терсинцева және Лариса Хоменко.
Осы жылы саммиттің басты тақырыбы «Әйелдер: батыл болашаққа көпір салуда» ұраны болды. Бірнеше күн бойы қатысушылар цифрлық экономика, жасанды интеллектті енгізу, әйелдер кәсіпкерлігін дамыту, жастар көшбасшылығын қолдау және әйелдерді ақпараттық технологиялар саласына тарту мәселелерін талқылады.
Қазақстан Іскер әйелдер қауымдастығының мүшесі Гүлвира Құдайқұлованың айтуынша, саммитке қатысу тәжірибе алмасу мен дамудың жаңа мүмкіндіктерін іздеудегі маңызды кезең болды:
— Мен үшін бұл Әйелдердің жаһандық саммитіне бесінші сапарым. Осындай әрбір кездесу — үйренуге, дамуға және жаңа білім алуға мүмкіндік береді. Осы жылы өткен саммит көптеген жарқын әсерлер, шабыт сыйлаған кездесулер мен пайдалы таныстықтар сыйлады. Мұндай шаралар көкжиекті кеңейтіп, жаңа идеялар табуға және алға бұрынғыдан да сенімді қадам жасауға көмектеседі. Әсіресе, өз тәжірибесімен бөлісуге және өзгелерге шабыт беруге дайын түрлі елдердің әйел көшбасшыларымен қарым-қатынас жасау өте құнды — деп атап өтті ол.
Global Summit of Women 2026 саммиті әлемнің 60-тан астам елінен келген қатысушылардың басын қосты. Олардың қатарында АҚШ, Испания, Әзербайжан, Эфиопия, Моңғолия, Қазақстан және басқа да көптеген мемлекеттердің өкілдері болды. Саммит экономика, технология және әлеуметтік даму салаларындағы жаһандық сын-қатерлерді талқылауға және ортақ шешімдерді іздеуге арналған алаңға айналды.
Пікірталас алаңдарында Z ұрпағымен өзара іс-қимыл мәселелеріне ерекше назар аударылды. Қатысушылардың пікірінше, табысты компаниялардың болашағы жас мамандар үшін қолайлы орта құрумен тікелей байланысты:
— Саммитке қатысқаннан кейін мен кез келген ұйымның жетістігі ұжымдағы салауатты атмосферадан басталатынына тағы бір мәрте көз жеткіздім. Бүгінде жаңа технологияларды енгізіп қана қоймай, қызметкерлердің, әсіресе жастардың дамуына жағдай жасау маңызды. Адамдар құрметті, қолдауды және өз идеяларын жүзеге асыру мүмкіндігін сезінуі тиіс. Дәл сенім, ашық коммуникация және мықты корпоративтік мәдениет бизнестің тұрақты дамуының негізіне айналады — деп бөлісті Гүлвира Құдайқұлова.
Форумның жарқын сәттерінің бірі астаналық оқушы Үкілі Омарованың сөзі болды. Ол сөйлеу қабілеті бұзылған балаларға арналған Soile AI жобасын халықаралық қауымдастыққа таныстырды. Жас әзірлеуші өз бастамасын ұсынып, қазақстандық инновациялардың әлеуетін көрсетті.
Сонымен қатар, саммит барысында 2028 жылы Global Summit of Women форумын Астана қаласында өткізу мүмкіндігі талқыланды. Егер бұл бастама қолдау тапса, Қазақстан әйелдер көшбасшылығы мен кәсіпкерлікті дамытуға арналған ең ауқымды халықаралық форумдардың бірін өткізетін алаңға айналады.
Ресми бағдарламадан кейін делегация үшін мәдени бағдарлама ұйымдастырылды. Іс-шараның серіктесі — Helios компаниясы қатысушыларға әйгілі Ялова термалды бұлақтарына саяхат ұйымдастырды. Қатысушылардың айтуынша, бағдарлама барлық ұсақ-түйегіне дейін ойластырылған, ал ұйымдастырушылардың қамқорлығы олардың сапарын ерекше жайлы еткен.
Қатысушылар саммит барысында басталған ынтымақтастық форум аяқталғаннан кейін де жалғасып жатқанын атап өтуде. Халықаралық байланыстар тәжірибе алмасуға, бірлескен жобаларға қатысуға және дамудың жаңа мүмкіндіктерін табуға жол ашады.
Келесі Global Summit of Women саммиті 2027 жылы Бангкок қаласында өтеді. Қостанай облысының өкілдері мұндай халықаралық алаңдарға қатысу тұлғалық өсуге, кәсіби дамуға және Қазақстан бастамаларын халықаралық деңгейде ілгерілетуге жаңа мүмкіндіктер ашатынына сенімді.
Елге оралған Қостанай облысының өкілдері өздерімен бірге жаңа білім мен идеяларды ғана емес, сонымен қатар Қазақстан әйелдерінің бизнесті табысты дамытып, инновациялық жобалар құрып, халықаралық ынтымақтастықты нығайтып және ел болашағына елеулі үлес қоса алатынына деген сенімді де ала келді.
Томирис КАИРБЕКОВА, сурет материал кейіпкерлері ұсынған
